تعليم مفهوم

طرق ونصائح تعلم لغة جديدة

مفهوم – كما يرفع موقع مفهوم شعار تعلم في الـ home, فنرغب ايضا في طرح كافة الطرق التي يمكن من خلالها التعلم، ونتحدث خلال شرحنا التالي عن الطرق والوسائل التي يمكن بها تعلم لغة جديدة، ونطرح خلاله الطرق التقليدية والجديدة لتعلم اي لغة جديدة:

الكورسات

-أول طريقة عشان تتعلم لغة جديدة هى أنك تاخد كورسات، و أحسن الأماكن غالبا بتكون المراكز الثقافية للدولة اللى عايز تتكلم لغتها زى مثلا Cervantes (المركز الثقافى الأسبانى) لو عايز تتعلم أسبانى أو الBritish Council لو عايز تتعلم أنجليزى و أحيانا فى بعض المراكز الثقافية بتقدم أول level ببلاش كوسيلة عشان ناس أكتر تتعلم اللغة زى المركز الثقافى الكورى بس بيكون فى فترات معينة.

-فى أماكن تانية و مراكز بتقدم كورسات لغات ومستواها كويس بس حاول تدور دايما على المدرسين اللى بيكونوا native speakers او الناطقين باللغة عشان تتعلم تنطق اللغة صح.

الدروس ال private

-فى مراكز بتقدم خدمات الدروس الخصوصية عشان تتعلم لغة معينة لوحدك مش مع مجموعة بس غالبا هتكون أغلى من الكورسات العادية.

-فى المراكز الثقافية فى ناس بتسيب بياناتها و عندها استعداد تعلمك لغتها ببلاش أو بأجر بسيط فى مقابل أنك تعلمهم العربى، و غالبا ما بتتقابلوا ساعتين، ساعة أنت تتعلم فيها اللغة اللى عايزها و ساعة تدى درس عربى.

-فى أجانب عايشين فى مصر و عندهم استعداد يعلموا لغتهم للمصريين، بس ممكن يكون صعب أنك تلاقيهم و لازم هتعمل سيرش كتير أو هتدور من خلال حد تعرفه لأنهم مش بيكونوا تبع أى مركز أو سنتر.

علم نفسك

-الانترنت يحتوى على دروس مجانية متنوعة ومختلفة ومميزة.
-اشترى كتب و CDs بتعلم اللغة اللى أنت عايزها.
-فى مواقع كتير بتعلم أى لغة و ببلاش، اشترك فى واحد فيهم و التزم بيه.
-على youtube هتلاقى دروس تعليم لغات و الميزة أنها هتكون بالنطق فهتستفيد أكتر.

حاجات لازم تعملها عشان تتعلم اى لغة

-لازم تعيش فى اللغة اللى عايز تتعلمها و تمارسها كل يوم، اتفرج على مسلسلات او أفلام او اسمع أغانى على ال youtube، ده هيقربك أكتر من تعلم اساسيات اللغة.
-لما تتعلم الاساسيات، اقرا كتب او روايات او حتى قصص أطفال باللغة اللى بتتعلمها و مش لازم تفهمهم بالكامل، بالممارسة هتبدأ تفهم الجمل و تركيباتها.
-سور الازبكية أحيانا بيكون عنده كتب بكل اللغات و بأسعار رخيصة بس المشكلة أنك هتدور كتير لحد ما تلاقى اللى أنت عايزه.
-اقرأ ترجمة الروايات اللى قريتها بالعربى للغة اللى عايز تتعلمها لأنك هتكون عارف الأحداث فتقدر تفهم أسرع و هتتعلم مصطلحات بسهولة.
-لو عايز تتعلم روسى مثلا لازم يكون معاك قاموس عربى-روسى/روسى-عربى عشان لو مش متاح ليك أنك تستخدم الانترنت و كمان هيساعدك و أنت بتقرا.
-دور على الجمل و المصطلحات العامية باللغة اللى عايز تتعلمها لأن ده هيفيدك كتير فى المحادثة و هيقربك أكتر من اهل البلد اللى هتتعلم لغتها.
-خصص كل يوم ساعة على الأقل لممارسة اللغة، شوف أفلام وثائقية أو أفلام عادية على الyoutube أو حتى أقرا الجرايد بتاعت البلد اللى هتتعلم لغتها و دى متاحة بسهولة online.
-لما تترجم كلمة معينة حاول تسمع النطق بتاعها و كررها عشان متنسهاش و ده متاح على google translate و المواقع اللى بتعلم اللغات.

أفكار زيادة ممكن تعملها لو تقدر

-حاول تتواصل مع حد من الnatives فى البلد اللى عايز تتعلم لغتها من خلال الأنترنت و كلمه كل فترة عشان يساعدك فى إتقان اللغة.
-فى مجموعات فى مصر بتتعمل للى بيتكلموا لغة معينة و بيتقابلوا مرة كل شهر، اعمل search عليهم أو اسأل فى المركز الثقافى اللى عايز تتعلم لغه بلده.
-لو عندك قمر أوروبى ممكن تجيب القنوات اللى بتتكلم اللغة و تسمع البرامج و الأخبار، و لو عندك انترنت سريع ممكن تسمع راديو الدولة اللى عايز تتعلم لغتها و أنت بتعمل أى حاجة طول اليوم.
-لو عايز تتعلم كورى مثلا روح مطاعم كورية و شوف الأكل اللى بيقدموه و أساميه، ده هيقربك أكتر من ثقافة البلد و أكيد هتتعلم مصطلحات جديدة.
-سافر البلد اللى عايز تتعلم لغتها و اختلط بشعبها، ده هيفيدك جدا فى الممارسة و هتتعلم حاجات أكتر من اللى أنت عارفها، ممكن تشوف لو فى أى نوع من التبادل الثقافى بين مصر و البلد دى و بكدة هتوفر فلوس السفر و هتدفع أقل.
-احضر cultural events – فاعليات ثقافية – فى المراكز الثقافية أو دار الأوبرا المصرية و أكيد هتقابل ناس من أهل البلد اللى عايز تتعلم لغتها.

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *