مفهوم – كاميرا الهاتف أصبحت من الأمور الهامة التي يختار على أساسها المستخدمون الهاتف، فقد أصبح التصوير بالهاتف شئ لا غنى عنه، خاصةً مع إنتشار الهواتف الذكية وارتفاع مستوى جودة وكفاءة كاميرات الهواتف، لكن في النهاية، كاميرا الموبايل مش كاميرا full option، ومش كل الامكانيات متاحة فيها، لذا إليك 7 نصائح للتصوير الإحترافي بكاميرا الهاتف:

1 – الاضاءة هي كل حاجة
زي اي كاميرا، الاضاءة هي اهم حاجة عشان تطلع صورة حلوة، لكن اهميتها بتتضاعف لما تكون بكاميرا موبايل! لأن الكاميرا بتاعتها مهما كان الكواليتي بتاعها مازالت محتاجة مجهود عشان تطلع صورة حلوة.وهنا ، الاضاءه هي صديقك المفضل !. مش دايما سهل تتحكم في الاضاءة ، بس فيه عاملين اساسيين لازم دايما تخليهم في دماغك :

• انت محتاج ضوء عشان الصورة تطلع حلوة.
• انت مش محتاج ضوء مباشر اطلاقا حط الحاجة الي عايز تصورها في ضوء غير مباشر ، ضوء شمس غير مباشر (افضل اختيار) او ضوء صناعي غير مباشر (تاني افضل اختيار). النصيحة دي بس لوحدها كدا ممكن تعمل الفرق من صورة وحشة لصورة حلوة!.

2 – الزووم لأ
الزووم البصري كويس في الكاميرات، لكن في كاميرا الموبايل، مبيكونش عندك غير الزووم الديجيتال، ودا بيبوظ الصورة ويبكسلها، يعني حجم الصورة في الحقيقة مش بيكبر، لكن الكاميرا بتكبرها ديجيتال، ودا اثره سئ تماما على كواليتي الصورة. لو بتستخدم كاميرا موبايل، انسى تماما موضوع الزووم دا، اتحرك وقرب انت من الصورة، ولو مفيش بد انك تاخدها غير بزووم، فكر انك تفكس للصورة خالص اصلا.

3 – ثبت ايدك !
لو هتاخد صورة بكاميرا الموبايل، اهم حاجة تثبت ايدك، دا بيكون صعب عادة بالموبايل، حاول تسند كوعك على حاجة او تثبت ايديك باي شكل، قلب في الاوبشنز بتاعت الكاميرا ولو لقيت stability option استخدمه، هيعمل فرق كبير في جودة الصورة.

4 – White balance
توازن الاضاءة واللون الابيض شئ مهم جدا في الوان الصورة عشان تطلع مظبوطة، اغلب الوقت بيكون الاوبشن دا في الموبايل سايبينه اوتوماتيك. لكن الحقيقة ان اغلب الصور الاوتوماتيك فيها مش بيطلع احسن الوان، جرب تغير ما بين daylight-fluorescent وباقي الاختيارات الموجودة لغاية ماتلاقي الانسب لصورتك والي الالوان فيه طالعة احلى حسب توع الاضاءة. الموضوع يستاهل تاخد دقيقة زيادة تظبطه فيها.

5 – قرب وخد لقطة ، متصورش من بعيد
دا يعتبر ملحق لنصيحة الزووم فوق، بس هو الموضوع اكتر من كدا، لما تحب تصور حاجة ، روح صورها، متصورش الخلفية، متمهمش باي حاجة تانية، قرب من اللقطة وخليها اكثر حميمية وصورها . طبعا دا لو بتاخد صورة “حاجة” مش بتلقط مشهد، الموضوع يختلف.

6 – تجنب الفلاش
الفلاش هو المصدر الاساسي لكل الصور الوحشة، على الاقل في عالم المصورين المبتدئين وبالتأكيد في عالم التصوير بالموبايل!.صحيح مش في كل الاوقات الكاميرا تقدر تلقط في اضاءة ضعيفة وهتضطر للفلاش، لكن النصيحة الذهبية، انه تجنب الفلاش كلما امكن ذلك. ومتعتمدش على الاوتو خالص!.

7 – الفلاتر حلوة، بس الفلتر مش هو الصورة مفيش حد مش بيحب الفلاتر والانستاجرام ، سواء الفلاتر الretro الي بتديك احساس البولارويد او الحاجات المطرقعة او البسيطة الي بتلمع الصورة بس. الفلاتر ممكن تخلي صورك احلى لو استخدمتها كويس. لكن الي متقدرش تعمله، انها تحول لك صورة من وحشة لحلوة . متعتمدش على الفلتر ينقذك، مش هيحصل. الفلاتر ب”تحسن” الصور الكويسة بس.باختصار متأفورش في استخدامها ومتعتمدش عليها تخلي صورتك الوحشة كويسة.